தற்போது நாட்டில் ஒரு அவசர நிலை ஆட்சி போன்ற நெருக்கடி ஏற்படுத்தப்பட்டிருக்கிறது. ஆனால், எதிர்ப்புக் குரல்களை ஒருபோதும் ஒடுக்கிவிட முடியாது,” என்று குஜராத் ஊடகவியலாளர் ரானா அய்யூப் கூறினார்.

rana-ayyub-lead-image

தற்போது நாட்டில் ஒரு அவசர நிலை ஆட்சி போன்ற நெருக்கடி ஏற்படுத்தப்பட்டிருக்கிறது. ஆனால், எதிர்ப்புக் குரல்களை ஒருபோதும் ஒடுக்கிவிட முடியாது,” என்று குஜராத் ஊடகவியலாளர் ரானா அய்யூப் கூறினார்.

குஜராத்தில் 2002ல் அரங்கேற்றப் பட்ட மதக்கலவரங்கள், இஸ்லாமிய மக்கள்மீதான திட்டமிட்ட வன்முறைகள், அவற்றின் பின்னணியில் ஆளுங்கட்சியினருக்கும் அதிகார வர்க்கத்தினருக்கும் இருந்த பங்கு ஆகியவைகுறித்து ‘குஜராத் கோப்புகள்’ என்ற ஆங்கில நூலை எழுதியவர் ரானா. ஊடகவியலாளரான இந்தப் பெண், குற்றவாளிகளாகத் தண்டிக்கப்பட வேண்டியவர்களைத் துணிச்சலாக சந்தித்து, அவர்கள் வாயிலிருந்தே உண்மைகளை வரவழைத்து இந்தப் புத்தகத்தைத் தொகுத்திருக்கி றார். இதற்காகத் தன்னை ஒரு சமஸ்கிருத மொழி அறிஞராகவும், ஒரு இந்துக் குடும்பப் பெண்ணாகவும் கூறிக்கொண்டு, உண்மை தெரிந்துவிட்டால் மிகப்பெரிய ஆபத்து உண்டு என்ற நிலையிலும் அந்த பேட்டிகளை எடுத்தார் என்பது குறிப்பிடத்தக்கது.

இன்றைய மத்திய ஆட்சியாளர்களைப் பகைத்துக்கொள்ளக்கூடாது என்ற மனநிலையோடு பதிப்பகங்கள் இந்தப் புத்தகத்தை வெளியிட மறுத்த நிலையில், ரானா தன் சொந்தப் பொறுப்பிலேயே நண்பர்களிடம் கடன் பெற்று புத்தகத்தை வெளியிட்டார். அந்த ஆங்கிலப் புத்தகத்தோடு, அதைத் தமிழாக்கம் செய்தும் வெளியிட்டிருக்கிறது பாரதி புத்தகாலயம். இப்புத்தகங்களின் வெளியீட்டு விழா இந்திய சமூக விஞ்ஞானக் கழகமும் இணைந்து புதனன்று (ஆக.17) சென்னையில் நடத்தப்பட்டது.

அதில் ஏற்புரையாற்றிய ரானா அய்யூப், “இந்திய மொழிகளில் தமிழில்தான் முதல் முறையாக இப்புத்தகம் வருகிறதுgujarath-files1 என்பது பெருமையளிக்கிறது,” என்றார். “புத்தகத்தில் பதிவு செய்யப்பட்டுள்ள உண்மைகளுக்காக அரங்கில் எழுந்த கரவொலிகள், இத்தகைய குரல்கள் துணிந்து எழுவதற்கான ஆதரவுகளாக மாற வேண்டும்” என்றார்.

“ஒரு முஸ்லிம் என்பதால்தான் இதைப் பற்றி எழுதினீர்களா என்று கேட்கிறார்கள். விளம்பரத்துக்காக எழுதினீர்களா என்றும் கேட்கிறார்கள். ஆனால் இது நீதிக்காக எழுதப்பட்ட நூல். முஸ்லிம் பெண்ணாக அல்ல, உண்மைகளை வெளிப்படுத்துவது ஒரு ஊடகவியலாளராக எனது கடமை என்ற உணர்வோடு நீதியைத் தேடி நான் மேற்கொண்ட பயணத்தின் விளைவுதான் இந்த நூல்,” என்றார் அவர்.

“ஜனநாயகம் என்பது கருத்து வெளிப்பாட்டுச் சுதந்திரமும் நீதியும்தான். இந்தப் புத்தகத்தில் குறிப் பிடப்பட்டிருப்பவர்களுக்கு நீதி கிடைக்கவில்லை. நீ ஏன் மோடியைத் தாக்கி எழுதியிருக்கிறாய் என்றும் சிலர் கேட்கிறார்கள். இந்தியாவில் வேறு எந்த மாநில முதல்வரும் பிணங்களை வைத்துக்கொண்டு, செய்தியாளர் சந்திப்புக் கூட்டம் நடத்தி, தன்னை முன்னிறுத்திக் கொள்ளவில்லையே,” என்றும் அவர் கூறினார்.

புத்தகத்தின் முதல் படியைப் பெற்றுக் கொண்ட காயிதே மில்லத் கல்வி அறக்கட்டளை தலைவர் தாவூத் மியாகான், “இந்தப் புத்தகம் கூறும் உண்மைகள் மக்களிடையே பரவினால், இன்று அதிகாரத்தில் இருக்கிற பலர் சிறையில் இருக்க நேரிடும்,” என்றார்.

“ஜனநாயக சக்திகளை அழித்து மத்தியில் குவிக்கப்பட்ட அதிகாரத்தை ஏற்படுத்துவதே ஆதிக்க மதவாதிகள் நோக்கம். அதற்கு ஆர்எஸ்எஸ் வழிகாட்டுகிறது. ஆனால் பாசிச சக்திகள் தற்காலிக வெற்றிகளைப் பெற்றாலும் இறுதியில் அழிந்துபோனார்கள் என்பதே வரலாறு” என்றும் அவர் குறிப்பிட்டார்.

தலைமை தாங்கிய தமுஎகச தலைவர் ச. தமிழ்ச்செல்வன், அபாயகரமான சூழலில், மைதிலி என்ற மாற்றுப் பெயரில், கிட்டத்தட்ட மாறுவேடத்தில், சில சமஸ்கிருத வார்த்தைகளையும் கற்றுக் கொண்டு, மதவெறியர்களை ரானா சந்தித்து உரையாடியதைக் குறிப்பிட்டார்.

“அரசாங்க எந்திரம் மதவெறி மயமாக்கப்படுவதில் குஜராத் ஒரு முன்மாதிரி மாநிலமாக்கப்பட்டிருக்கிறது. அந்த உண்மைகள் நாட்டு மக்களுக்குத் தெரிய வர வேண்டும். இந்தப் புத்தகத்தின் செய்திகளை மக்களிடையே பரப்புரை செய்கிற கடமை நம் ஒவ்வொருவருக்கும் இருக்கிறது,” என்றார் அவர்.

மூத்த பத்திரிகையாளர் ஞாநி தமது வாழ்த்துரையில், “2019ல் பாஜக மறுபடியும் ஆட்சிக்கு வருமானால், இப்போது ஒலிக்கிற எதிர்ப்புக் குரல்களும் அப்போது எழ முடியாத நிலைமை ஏற்படும். இந்தியா எளிதில் மீள முடியாத பாதாளத்தில் விழுந்துவிடும். அதைத் தடுப்பதற்கான போராட்டத்திற்கு ஒரு அறிவாயுதமாக ரானாவின் புத்தகம் வந்திருக்கிறது,” என்றார்.

ஆய்வாளர் அறிவுக்கரசி, “வர்க்கப் போராட்டம் மேலெழுந்து விடாமல் தடுக்க சாதி-மத அரசியல் கையாளப்படுவதற்கான ஆதாரங்களை இந்தப் புத்தகம் தருகிறது. தலித் மக்களுக்கு அதிகாரம் தரமாட்டோம் என்கிற பிற்படுத்தப்பட்ட சாதிகள், மேல் வர்ண சாதிகள் அரசியலையும் ரானா சுட்டிக்காட்டியிருக்கிறார்,” என்று கூறினார்.

இந்திய ஜனநாயக வாலிபர் சங்க மாநிலப் பொருளாளர் தீபா, “ரானா பேட்டிகளுக்காகச் சென்றபோது பல தடைகளை ஏற்படுத்த முயன்றவர்கள், புத்தகம் வெளியான பிறகு மவுனமாக இருப்பது, புத்தகத்திற்கு விளம்பரம் கிடைத்துவிடக் கூடாது என்பதற்காக மட்டுமல்ல, உண்மைகள் வெளிப்படுகின்றன என்ற அச்சத்தாலும்தான்,” என்றார்.

அரசியல் கட்சிகளையும் பல்வேறு பொது அமைப்புகளையும் சேர்ந்தோர் வெகுவாகப் பங்கேற்ற இந்த நிகழ்ச்சியில் மார்க்சிஸ்ட் கம்யூனிஸ்ட் கட்சியின் தென் சென்னை மாவட்டச் செயலாளர் ஏ. பாக்கியம் வரவேற்றார். சமூக விஞ்ஞானக் கழக செயலாளர் ஞானகுரு நன்றி கூறினார்.

ரானாவின் தாயார் ஒரு பாரத மாதா

புத்தகத்தை வெளியிட்ட, நாடாளுமன்ற மாநிலங்களவை உறுப்பினரும் மார்க்சிஸ்ட் கட்சியின் மத்தியக் குழு உறுப்பினருமான டி.கே. ரங்கராஜன், “26 வயதுப் பெண் ஆபத்துமிக்க பேட்டிகளை எடுக்கச் சென்று பாதுகாப்பாகத் திரும்பி வந்தார் என்பது வியப்புக்குரிய அற்புதம். ரானாவை இந்த முயற்சியில் ஈடுபட ஊக்கமளித்துத் துணிச்சலாக அனுப்பி வைத்த அவரது தாயாரை ஒரு பாரதமாதாவாக நான் போற்றுகிறேன்,” என்றார்.

“குஜராத்தில் ஒவ்வொரு பத்தாண்டுகளுக்கும் ஒரு முறை சிறுபான்மையினர்மீது இந்து மதவெறி அமைப்புகளால் தாக்குதல் நடத்தப்பட்டு வந்திருக்கிறது. தற்போது அந்தத் தாக்குதல் தலித்துகள் மீதும் திருப்பிவிடப்பட்டிருக்கிறது. 1980களில், 90களில் நடந்த தாக்குதல்களைப் போல அல்லாமல், 2002ம் ஆண்டின் தாக்குதல்கள், மதவாதிகள் கிராமங்களை நோக்கிச் சென்றதன் பின்னணியில் நடந்திருப்பதைக் கவலையோடு பார்க்க வேண்டும். தமிழகத்திலும் இதுபோன்ற தாக்குதல்கள் வாய்ப்புக் கிடைக்கிறபோதெல்லாம் நடத்தப்பட்டு வந்திருக்கின்றன என்று கூறிய அவர், கோவை வன்முறைகளை நினைவுகூர்ந்தார். சனாதன ஆர்எஸ்எஸ் தலைவர்கள், நரேந்திர மோடியை பிரதமராக்க ஒப்புக் கொண்டதன் அரசியல் நுட்பத்தை ரானாவின் புத்தகம் எடுத்துக்காட்டுகிறது” என்றார் அவர்.

=